1Ch 16 | ZomZIV | STEP | Amaute in Pasian singkuangpi pua uh a, David in tua dingin a zalsa puanbuk sungah koihin amaute in meihal biakna, kilawmtakna biakna , Pasian mai-ah a pia uh hi.

1 Amaute in Pasian singkuangpi pua uh a, David in tua dingin a zalsa puanbuk sungah koihin amaute in meihal biakna, kilawmtakna biakna ^{▼▼16.1 Tang ngeina-in kilemna biaknate tg.2 ah zong}, Pasian mai-ah a pia uh hi. 2 David in meihal biakna le kilawmtakna biakna a piak khit ciangin TOPA minin mipite thupha a pia hi. 3 Tua ciangin Israel-te a numei a pasalin anlum khat, nisuh moh khat le lenggah moh khatciat a pia hi.

4 Amah in TOPA singkuangpi mai-ah nasem ding, deihna ngen ding, lungdam ko ding, TOPA Israel Pasian a phat dingin Levi-te seh a: 5 A makaipi Asaph, a nihna Zechariah, tua ciangin Jeiel, Shemiramoth, Jeriel, Mattithiah, Eliab, Benaiah, Obed-Edom le Jeiel ahi hi. Amaute in lyre-te le harp-te tumin, Asaph in daltuah tum dinga, 6 siampi Benaiah le Jahaziel-te in Pasian thukhun singkuangpi mai-ah a hunhunin pengkul a mut ding uh hi.

David Lungdamkohna La

7 Tua ni-in David in Asaph le ama kikoppihte hih lungdamkohna la TOPA a sak dingun a masapenin a ap hi.

8 TOPA tungah lungdam koin, a min lo unla; ^b
ama sepsate minamte lakah kitheisak un. ^c
9 Amah la sak un, amah phatna la sak un;
ama sepsa a lamdang teng genkhia un.
10 A min siangtho thangsak un;
TOPA a zongte lungsim nuam ta hen.
11 TOPA le ama hatna enkawmin;
ama maitang zong den un. ^d
12 Ama sepsa a lamdangte, ^e
ama nalamdang bawlte le a genkhiat a thukhennate, ^f
13 ama nasem Israel suante aw,
ama teelsa Jacob tapate aw, phawk gige un.
14 Amah TOPA eite Pasian hi a;
leitung khempeuh ah a thukhennate a om hi. ^g
15 Amah in a thukhun phawk tawntung a,
a thupiaksa kammal khang tul khat dong a ciamteh ^{▼▼16.15 Septuagint khutgelh pawlkhat, le Vulgate ah (Ph. 105:12 zong en in); Hebrew in phawk} hi,
16 tua in Abraham tawh a thukhun ⁱ
Jacob tungah tom lo-a a thuciam ahi hi.
17 Amah in Jacob tungah thukip in kipsak a, ^j
tawntung thukhunin kipsakin,
18 “Luah in na tan dingin nang tungah
Canaan gam kong pia ding hi,” a ci hi. ^k
19 Amaute ^{▼▼16.18-20 Hebrew khutgelh khat, Septuagint le Vulgate (Ph. 105:12 zong en in); Hebrew khutgelh tampen ah / note na phazah uh atawm hangin / na tam takpi uh a tua lai-ah luah in, note mikhualin na om uh hi. 20 Amaute} tawmkha bek pha uh a, ^m
tawm takpi-in tua gamah mikhual suak uh a,
20 gam khat pan gam khat,
kumpi-gam khat pan adang khatah a pai kawikawi uh hi.
21 Amah in amaute kuama nuai-et ding phal loin,
amaute a khualna-in kumpite tai a; ⁿ
22 “Ka sathau nilhte lawngkha kei unla;
ka kamsangte nasak kei un,” a ci hi.
23 Leitung khempeuh aw, TOPA la sak un;
nisimin ama hotkhiatna tangko un.
24 Minamte lakah ama minthanna pulak unla,
mi khempeuh lakah a nasepna piandangte pulakkhia un.
25 Ahang in, TOPA liana, a phattak pen ahi hi; ^o
pasiante khempeuh khengin kihtak ding ahi hi. ^p
26 Minamte pasiante khempeuh milimte hi-a,
TOPA in ahileh vante a bawl hi. ^q
27 Ama mai-ah thupina le ukzawhna om a;
ama omna munah thahatna le lungnopna a om hi.
28 Minamte innkuante aw, TOPA ahi bangin hisak un,
TOPA a minthanna le a hatna bangin hisak un, ^r
29 Ama minthanna ^{▼▼16.29 Ahikeh ama thupina tawh TOPA} tawh kituakin TOPA minthangsak un.
Biakna khat kengin ama mai hong zuan un;
ama sianthona, a thupina tawh kituakin TOPA bia un.
30 Leitung khempeuh ama mai-ah ling un! ^t
Leitung kiptakin kikhosak a; a kikhin thei kei ding hi.
31 Vante nuam uh henla, leitung kipak hen; ^u
amaute in minamte tungah,
“TOPA in uk hi,” ci uh hen. ^v
32 Tuipi le a sunga omte khempeuh in kithawnsak uh hen; ^w
lote le a sunga omte in nuamsa uh hen!
33 Tua ciangin leitung thukhenin TOPA hong pai ding ahi manin
tulak singkungte khempeuh in
ama mai-ah lungnuamin la sa ding uh hi. ^x
34 TOPA hoih ahi manin ama tungah lungdam ko un;
ama itna kip tawntung hi.
35 Kiko unla, “Kote Honpa Pasian aw, kote hong hon in; ^y
na min siangtho tungah lungdam ka koh theih nading uh le
na minthang ka phat theih nadingun
minamte panin kote hong kaikhawm inla hong hukhia in,” ci un.
36 A tawntung pan tawntung dongin
TOPA, Israel Pasian in phatna ngah ta hen.

Tua khit ciangin mi khempeuh in, “Amen, TOPA phat un,” a ci uh hi.

37 David in nisimin kisapna tawh kizui a hunhun a TOPA thukhun singkuangpi mai-a nasem dingin Asaph le amah a huhte a nusia hi. 38 Amah in amaute tawh a semkhawm dingin Obed-Edom le amah a huh sawmguk le giatte zong a nusia hi. Jeduthun tapa Obed-Edom le Hosah zong kongpi cingte ahi uh hi.

39 David in siampi Zadok le ama siampi naseppihte Gibeon a munsang tunga TOPA biakbuk mai-ah 40 TOPA in Israel a piaksa ama thukham khempeuh tawh kizui-in zingsang le nitak a hunhunin meihal biakna-tau tungah TOPA tunga meihal biakna a pia dingin a nusia hi. 41 Amaute tawh Heman le Jeduthun le TOPA tungah lungdam ko dinga a kiteelsa a mina kilote in “ahang in, ama itna kip tawntung hi,” ci ding uh hi. 42 Heman le Jeduthun-te in la siangtho sak cianga kitum, pengkulte daltuahte le tumtheih kitum dangte awging a uk uh hi. Jeduthun tapate in kongpi ah mun a nei uh hi. ^z

43 Tua khit ciangin mite khempeuh amau neihsa inn ciatah ciah uh a, ama innkuanpihte thupha pia dingin a inn ah David a ciah hi.